Cavidan
Geniş göylər altında
ağac kimi
bir yerə yapışıb qalmaq,
onun-bunun üzərinə kölgə salmaq istəmirəm.
Qanadım var, uçmaq üçün doğulmuşam, –
Yarı insan, yarı quşam.
“Davakaram”, –
sürü-sürü nadanlarla yollaşmıram!
Sınıq-salxaq, köhnə-küşkül əqidəli
insanlarla yollaşmıram!
Əcdadının kölgəsində yatanlarla yollaşmıram!
Əmmaməli, səccadəli şeytanlarla yollaşmıram!..
İyrəndirir maskalanmış üzlər məni,
ürpəndirir buz baxışlı gözlər məni,
hirsləndirir yalan-palan sözlər məni…
saxtakarlıq, hap-gopçuluq istəmirəm!..
Qoy, nə deyir desin mənə
filankəs, bəhmənkəs, –
dəliyəm, doluyam,
höcətəm, hücətəm,
hər nəyəm – buyam.
Əlqərəz,
mən (!) sadəcə doğruçuyam.
Yazıya 807 dəfə baxılıb
