“Hədəf Nəşrləri”nin “Bilgənin macəraları” uşaq seriyası kitabları üçün elan edilən müəllif tenderi yekunlaşıb.
kultur.az “Hədəf Nəşrləri”nə istinadən xəbər verir ki, iyulun 10-da təşkil olunan tədbirdə tenderin qalibləri açıqlanıb.
İştirakçılardan Aynur Cavid (Aynur Qarayeva) və Cəmilə Məmmədli qalib elan olunublar.
Qeyd edək ki, ilkin mərhələdə tenderin mükafat fondu 2500 manat nəzərdə tutulsa da, daha sonra 3000 manat təyin olunub. Qalib isə bir yox, iki nəfər seçilib.
Tədbirdə “Hədəf Nəşrləri”nin direktoru, yazıçı-tərcüməçi Səbuhi Şahmursoy çıxış edərək tenderin elan olunma səbəblərindən, ölkənin kitab industriyasından, nəşriyyat sahəsindəki problemlərdən danışıb. Nəzərə çatdırıb ki, tenderin əsas məqsədlərindən biri də yerli ədəbiyyata yeni nəfəs qazandırmaqdır. İştirkaçılara təşəkkürünü bildirən direktor onu da vurğulayıb ki, tender şəffaf şəkildə, obyektivlik tam qorunmaqla həyata keçirilib, ən layiqli iştirakçılar qalib elan olunub.
Nəşriyyatın metodik vəsaitlər üzrə direktor müavini Nizami Hüseynov iştirakçıların təqdim etdiyi mətnləri, eləcə də topladığı balları analiz edib, münsiflər heyəti tərəfindən verilən balları əsaslandırıb.
Aynur Cavid və Cəmilə Məmmədli – qaliblər çıxış edərək tender təşkilatçılarına öz minnətdarlıqlarını ifadə edib, etimadı doğruldacaqlarına əmin olduqlarını vurğulayıblar.
Tədbir müzakirələrlə davam edib.
Yazıya 226 dəfə baxılıb
