Sevimli bəstəkarımız Qəmbər Hüseynli  bəşəriyyətə Nizami Gəncəvi kimi böyük düha bəxş etmiş, zəngin tarixə malik, füsunkar təbiətli Gəncə şəhərində doğulub boya-başa çatıb.

Könülləri oxşayan, qəlbləri riqqətə gətirən “Tellər oynadı”, “İlk məhəbbət, “Çeşmə başında”, “Ceyran”, “Nədən oldu”, “Gülə-gülə”,  “Tel nazik”,  “ Dağlar”  və s. onlarla ecəzkar mahnının müəllifi məhz Qəmbər Hüseyinli olub. İstedadlı sənətkarın melodiyaları bu gün də sevilə-sevilə dinlənilir, aktuallığını itirmir.

1947-ci ildə  Tofiq Mətləbovun sözlərinə bəstələdiyi “Cücələrim” mahnısı bəstəkara dünya şöhrəti qazandırıb. Uşaqların himninə çevrilmiş bu mahnının sədası xarici ölkələrdən gəlir. Bu bir həqiqətdir. Onu səciyyələndirən iki epizodu diqqətə çatdırmaq kifayətdir:

Respublikanın bir qurup kino işçisi Parisdə olarkən  tanınmış kino ulduzu  Çarli Çaplin biləndə ki, bu heyət Azərbaycandandır, dərhal royal arxasına keçib “Cücələrim” mahnısını ifa edir və deyir:   – “deməli siz bu melodiyanın vətənindənsiniz, məndən onun bəstəkarına salam deyin”.

Xalq artisti, gözəl müğənnimiz Elmira Rəhimova bir müddət Hindistanda yaşayıb. Müğənninin açıq səma altında oxuduğu “Cücələrim “ mahnısı sürəkli alqışlarla qarşılanır. Ən maraqlısı o idi ki, 30 minlik hind tamaşaçısı mahnını xorla oxuyur və sonra müğənnidən həmin mahnını təkrar etməsini xahiş edirlər.

Bəstəkarın ömür yolu çox qısa olub. Yaradıcılığının çiçəklənən dövründə – 1961-ci ildə 45 yaşında dünyasını dəyişmişdir. Vəsiyyətinə əməl olunaraq Qəmbər Hüseynli doğma vətəni Gəncədə uşaq parkında dəfn edilib. Məzar üstünə qoyulmuş qara mərmərdə Qəmbər Hüseynlinin portreti və melodiyalarından nümunələr həkk olunub.  O vaxtdan sənətkarın məzarı  sənətsevərlərin və xarici qonaqların ziyarətgahına çevirilib.

Sevindirici haldır ki, şəhər rəhbərliyi milli-mənəvi dəyərlərə böyük önəm verir. İnanıram ki, dünya şöhrətli bəstəkar Qəmbər Hüseynlinin qəbirüstü abidəsi də bu qayğı və diqqətdən kənar qalmayacaq və məzar üstündə bəstəkarın büstü ucaldılacaq.

Tofiq AZƏRİ