Döyüşdə tək qalan əsgərin sonuncu ümidi,
Sonuncu gülləsidi
İntihar edən Qazi.
O son güllə
Əvvəl əsgərin arzularına,
Sonra alnına,
Sonra anasının ürəyinə sıxıldı…
Oğula dəyən güllənin atəşi ananın sinəsindən çıxdıqca
İsindi oğlunu döyüşdən gizlədən məmurun sarayı.
Kasıb komalardakı Şəhid övladlarının
İsti paltarıdı
Intihar edən Qazi.
Qazinin sinəsinə od düşdükcə
Şəhid gödəkçələrinin
güllə yerindən tüstü qalxdı…
Şəhid balalarının gözləri acışdı
Və o gözlərdə qorunan ata silueti də boğuldu…
Üşüdü Şəhid balaları…
“Ya Qarabağ, ya ölüm” – deyə ölümə yollanan
Oğulların alnına düşən qırış,
Ümidinə çökən axşamdır
İntihar edən Qazi!
Bir gün
Qolunu mənə,
Gözünü sənə,
Ayağını ona,
Ürəyini vətənə verənlərin
Qolları, ayaqları gözləri, ürəkləri quruyacaq,
“Ya Qarabağ, ya ölüm” – deyə ölümə yollanan
Oğulların alnına düşən qırışın,
Ümidinə çökən axşamın qaranlığında boğulacağıq!
Bir daha gün doğmayacaq üzümüzə,
Allah da rəhm etməyəcək bizə!
Bakı-2024
Yazıya 65 dəfə baxılıb
