kultur.az xəbər verir ki, 26 dekabr 2021-ci il tarixində Şəhid Elfaq Nağıyevin doğum günü münasibətilə mərasim keçirildi. Mərasimdə Şəhid ailələri, qazilər, Elfaq Nağıyevin döyüş yoldaşları, Bakı şəhər Sabunçu rayon rəhbərliyinin nümayəndələri, Milli Məclisin deputatlartı, ictimai qurumlar, ziyalılar, media işçiləri və bütün Elfaqsevərlər iştirak edirdi.
Tədbir iştirakçıları ilk olaraq adı Hadrutla birgə çəkilən, Hadrutun düşmən tapdağından azad edilməsində xüsusi qəhrəmanlıqlarıyla seçilən Elfaq Nağıyevin xatirəsinə ucaldılmış ehsan bulağını ziyarət etdilər. Ziyarət sonrası Zabrat qəsəbəsindəki mərasim evində bir araya gələn iştirakçılar 44 günlük Vətən Müharibəsi Şəhidlərinin xatirəsini bir dəqiqəlik sükutla yad etdilər. Azərbaycanın Dövlət Himninin sədalarından sonra çıxışçılar xalqımıza zəfər sevincini yaşadan, ordumuza müzəffər ordu adını qazandıran Şəhid və qazilərimizdən, müzəffər ordunun qalib sərkərdəsi – Ali Baş Komandanımız İlham Əliyevdən qürurla söz açdılar.
Mərasimin bədii hissəsi ilahiyyatçı müğənnilərin musiqi nömrələri, Bakı şəhər 307 nömrəli orta məktəbin müəllimi Sevinc Məmmədovanın təşkil etdiyi “Şəhidlər ölməz” adlı kompozisiya ilə davam etdrildi. 4 e sinif şagirdlərinin hazırladıqları şeir və mahnılar mərasim iştirakçılarının gələcəyə olan ümidini bir daha doğrultdu.
45 nömrəli orta məktəbin şagirdi Aytac İsmayılovanın ifasında səslənən “Xudayar təsnifi” ölməzlərimizin ruhunu, bizimsə qəlbimizi şad etdi.
Xatırladaq ki, Nağıyev Elfaq Azad oğlu 26 dekabr 1996-cı ildə Gədəbəy rayonu Parakənd kəndində anadan olub.
2003-cü ildə Parakənd orta məktəbinə gedib, 2007-ci ildən Baki şəhərində orta təhsilini davam etdirib.
2012-ci ildə Şamaxı Humanitar Kollecində bədən tərbiyəsi müəllimliyi fakültəsinə qəbul olub.
2016-cı ildə hərbi xidmətə yola düşüb.
2019-cu ildə Hərbi Akademiyanın gizirlik kursunda təhsil alıb və hərbi fəaliyyətini davam etdirib.
2020-ci ilin sentyabrında Qarabağın azadlığı uğrunda gedən döyüşlərə qatılıb. Füzuli, Cəbrayıl, Zəngilan, Qubadlı, Hadrut qəsəbəsi və bir neçə strateji yüksəkliklərin azad olunmasında igidliklər göstərib.
21 oktyabr 2020-ci ildə Xocavəndin alınması uğrunda gedən döyüşlərdə qəhrəmancasına Şəhid olub.
23 oktyabr 2020-ci ildə doğulduğu kənddə dəfn edilib.
Qəhrəmanımız Şəhadətindən sonra “Vətən uğrunda”, “İgidliyə görə”, “Cəbrayılın azad olunmasına” Xocavəndin azad olunmasına görə”, “Füzulinin azad olunmasına görə” medallarına layiq görülüb.
Yazıya 424 dəfə baxılıb
