Azərbaycan yazıçılarının Türkiyəli həmkarlarına MÜRACİƏTİ

mübariz
Bir qrup Azərbaycan yazıçısının Türkiyəli həmkarlarına 
MÜRACİƏTİ

Əziz qardaşlarımız!

Dünyanın bu ağır günlərində Türkiyədən aldığımız təəssüf doğurucu bir xəbər bizi Sizə müraciət etməyə səslədi: ötən həftə qardaş ölkədə və dünyada tannmış iş adamı, həmvətənimiz Mübariz Qurbanoğlu Mənsimovun İstanbulda  həbsə  alınması onun ailəsi, doğmaları və yaxınları ilə bərabər, bizdə də acı təəssüf hissi doğurub.
Bildiririk ki,  2007-ci ildən Türkiyə vətəndaşlığını qəbul edərək Qurbanoğlu soyadını götürən Mübariz bəy bütün türk dünyasının zənginlərindən biridir və o, hər zaman  TÜRK  adına  sədaqətli olmuş,  TÜRK xalqına  canla-başla xidmət etmişdir.  Dünyanın ən böyük 5 dənizçilik şirkətindən biri olan “Palmali” Şirkətlər Qrupunun sahibi  kimi  Mübariz  bəy hələ gənc yaşlarından mesenatlıq, xeyirxahlıq, səxavət, Vətən təəssübkeşliyi kimi ən ali fəzilətləri özündə cəmləşdirən nadir bir iş adamı və insandır. Şübhəsiz, onun maddi zənginliyinin arxasında dərin zəkası ilə yanaşı, gərgin zəhməti də durur.  Sizə də məlumdur ki, Mübariz bəy öz köməyini ona ehtiyacı olan insanlardan heç vaxt əsirgəməyib. Bir  xeyriyyəçi  kimi o, Türkiyədə  təhsil alan  azərbaycanlı tələbələrin təhsil xərclərini ödəmiş, çoxlu  sayda şəhid ailəsinə, Türkiyədə və  Azərbaycanda  tanınmış ədəbiyyat və mədəniyyət xadimlərinə təmənnasız yardımlar göstərmişdir.
Mübariz Qurbanoğlunun  sahibi olduğu “Palmali” Şirkətlər qrupunun Türkiyədə  və Azərbaycanda tikdirdiyi məktəblərin, binaların, xəstəxanaların, habelə mədəniyyət, incəsənət, idman, səhiyyə və digər social sahələrə ayırdığı yatırımların sayı hesabı yoxdur. Bütün bunlar onun həm bir vətəndaş, həm də bir insan və sağlam iş adamı obrazını yaratmış, bütün türk dünyasında ona böyük nüfuz və ehtiram gətirmişdir.
Türk mehmetçiklərinin şəhidliyini öz şəhidi, itkisi kimi qəbul edən   Mübariz bəy həm də  Azərbaycanın QARABAĞ  uğrunda mübarizəsi və faciələrimizin  dünyada  tanınması istiqamətində aparılan  əməli işlərə də hər zaman dəstək olub.
Əziz həmkarlarımız! 
Siz də bilirsiniz ki, bu gün bütün dünyanın, o cümlədən Türkiyə və Azərbaycanın da qarşılaşdığı koronavirus problemi hamı üçün ciddi təhlükələr vəd edir. Türkiyə və Azərbaycan kimi ölkələrdə bu cür problemlərin öhdəsindən gəlmək işində dövlətlərlə yanaşı, Mübariz Mənsimov kimi iş adamlarına da ciddi ehtiyac yaranır. Bu baxımdan hesab edirik ki, Mənsimovun həbsi bütün türk dünyası üçün təkcə adi hüquq hadisəsi deyil, həm də ciddi sosial məsələdir. Belə bir təəssüfdoğurucu addımın məhz  canımız, qanımız bir olan Türkiyəmizdə atılması bizim üçün ayrı bir ağrıdır.
Çox təəssüflə bildiririk ki, bəzən xeyirxah əməllərin özündə də qəbahət axtaranlar tapılır. Düşünürük ki, Mübariz bəyin ictimai və iqtisadi fəaliyyəti fonunda gördüyü xoş niyyətli əməllərində qaranlıq məqamlar axtaranlar var və mümkündür. Biz Mübariz bəyin hər hansı  terrorçu qruplaşması ilə ilgili olmasına qəti şəkildə inanmaq istəmirik! Biz Mübariz bəyin hansısa bədxah niyyətli insanlara dəstək vermiş olduğuna inanmaq istəmirik! Biz qardaş Türkiyə Cümhuriyyətinin Ədalət Məhkəməsinə qəlbən inanır və əmin olduğumuzu bildirirk ki, Ədalət və Sağlam düşüncə qalib gələcək! Türk xalqını və Vətənini canından belə əziz tutan Mübariz Qurbanoğlu Mənsimovun tezliklə azadlığa çıxacağına və öz ailəsinin, yaxınlarının və doğmalarının yanına dönəcəyinə ümid edir və Sizi də belə bir humanist istəyə qoşulmağa, HAQQIN yanında olmağa çağırırıq.
Dərin ehtiramla,
    Sabir Rüstəmxanlı,   Aqşin  Babayev, Tofiq Hüseyn,  Vaqif  Yusifli, Kamran Nəzirli,  Yaşar, Ağacəfər  Həsənli, Tofiq Nurəli, Süleyman Hüseynov, Xanım İsmayılqızı, Kəmalə Abiyeva, Adilə Nəzər,  Zakir Abbas, Əlisəmid Kür,  Nurəddin Ədiloğlu,  Faiq Balabəyli, Əlabbas Bağırov, Aslan Quliyev, Qəni Camalzadə,  İlqar Rəsul,  Nəcibə İlkin,  Azad Qaradərəli, Ehtiram İlham, Osman Fərmanoğlu,  Mübariz Örən, Nurəddin Mirzəxanlı, Əli Nəcəfxanlı, Rafael Tağızadə, Aqil Yaqub, Aydın Canıyev, Mehman Qaraxanlı, Eyvaz Zeynalov, Hikmət Məlikzadə,   Fərid Hüseyn, Şəhriyar Del Gerani, Xatirə Xatun, Şərafəddin İlkin,  Süleyman Əlisa, Aysel Əlizadə, Sədaqət Elqızı, İqbal Nemət,  Ağəddin Babayev, Əli Rzazadə, Mehman Göytəpəli,  Akif Əhmədgil, Əyyub Qiyas,  Elmira Aslanxanlı, İradə Aytel,  Mayis Təmkin,  İlham Qazaxlı, Mənsurə Qaçayqızı, Etibar Qoca, Şahin Həmidli, Xanəli Talış, Telman  Oğayət, Qafar Cəfərli, Tərlan Salehi, Kənan Hacı.
    Yazıya (291) dəfə baxılıb

Şərhlər

Şərh

Pin It

Comments are closed.