Səfər Rzasoylu – Dostum Əhməd Oğuzun xatirəsinə üç şeir

11Başdaşı şəkli…Yoxluq

Torpaq keçər aramızdan (Salam Sarvan)

Baxırsan…

gülsən də, nisgilin dərin

Baxışın dünyadan üzün çevirib.

İsa nəfəsidi  şəkildə sirrin—

Şəklin ölümünə dirilik verib.

 

Mən ağac yanına, adam yanına

indi Yoxluğunla birgə gedirəm.

Kim var ki, kimsəsiz küçədi dünya

Daha Yoxluğunla dostluq edirəm.

 

Yağış altında da, toyda, yasda da,

Sənin  yoxluğuna yer tapıram mən.

Hələ çox körpədir Yoxluğun, onu

Ana tək yanımda aparıram mən…

 

Bura Ay yeridir, Günəş yeridir,

Kiməm ki? Qonağam, yoxam bir azdan.

Nə yağış, nə külək, nə bir hənirti…

Yoxluğundu keçən ta aramızdan…

 

…Başım əsim – əsim səslərlə dolu

Yoxsa damarımdan küləklər axır?!

Min ilin ən gözəl rəsmidir Şəklin—

Sirrindən Bu dunya, O dünya baxır!!!

 

 

 

ƏHMƏD OGUZA

Ah- ah səni səsləyirəm

Başıma küllər tökmüsən.

Tüstü- tüstü ahım yetməz,

Göyün qapısın tikmisən.

***

Yoxluğun varı yox edir,

Durub- durub nə ölmüsən.

Torpağı nə geyinmisən

Bəlkə bilməyib ölmüsən.

***

Gündüz- kəfən, gecə- tabut,

Ölüb mənə nə almısan…

Bu dünyanı ac it kimi,

Qurdtək arxamca salmısan…

 

 

Sonuncu Şeir

Ağaclar bayquş yarpaqladı

matəm küləyini oxuyur

yarpaq-yarpaq qarğalar…

Soyunsam, ah, soyunsam bədənimi

çəkilərmi ağrılar…

Bura ümidsiz limanmış, Əhməd

nahaqdan…nahaqdan bir yarı səs,

bir yarı pıçıltı gözləyirəm O dünyadan…

Kimsə od vurub Zamana—

qaçır Zaman — tövşüyə- tövşüyə.

təntiyə-təntiyə.

Zaman yorğun—

son mənzilə çatmış tabut kimi

az qala dayana…

Ayrılıq Allahsız dinmiş,Din…

dayanın,— kimsə bir şəkil çəksin,

mənımlə O dünyadan

çiyin-çiyinə,

kürək- kürəyə dayanmış Əhmədin !!!

Yazıya 124 dəfə baxılıb

Şərhlər

Şərh

Pin It

Comments are closed.