Çatırmı sənə səndə?
Dərd var hər dənəsində.
Ürəyi sinəsində,
Ağrılı-acılıdır,
Baxın, bu Xocalıdır!

Dilinin duasıyla,
Üzünün həyasıyla.
Çiçəyi, qayasıyla,
Qardaşlı-bacılıdır,
Baxın, bu, Xocalıdır!

Yağı alan evləri,
Çoxu talan evləri,
Ağlar qalan evləri,
Qapılı-bacalıdır,
Baxın, bu, Xocalıdır!

Bulağı başı daşlı,
Göy gözlü, yaşıl qaşlı.
Cavankən olub yaşlı,
Qarılı, qocalıdır,
Baxın bu, Xocalıdır!

Qara bağlı bağları,
Çoxdan çoxdur ağları.
Altdan, üstdən dağları,
Alçaqlı, ucalıdır,
Baxın bu, Xocalıdır!