Həyatı əllərində
sönmüş çıraq kimiydi…
Seçəmmirdi insanı-
Yaxın , qıraq kimiydi?…
.
üzü xəzan yarpağı,
Əlləri qabar idi…
O keçdiyi küçələr,
İndi dardan, dar idi…
.
necə qəribsəmişdi,
Dost tanışdan aralı…
Meyli hara ilişsə,
Ehh, olardı oralı…
.
Neçə-neçə ürəkdən
Süzdürdü o sazağı.
Ona demişdim vallah,
“Yeyər ömrü qız ahı!”
.
Dünən gözümdə qalıb…
.
Sabaha yox gümanım
Dünən gözümdə qalıb…
Dünənlərin gecəsi
Hopub üzümdə qalıb…
.
Hər gün öz cığırını
Salar üzümdən asta…
Dünya öz ocağını
Qalar sözümdən asta…
.
dilim nəğmə hörəcək
Əcəl sinə gərəcək…
Bir də ruhum görəcək
Özüm sözümdə qalıb…
.
Yoxluğun yaxın mənə…
.
Həsrətin yeddi arşın,
Yoxluğun yaxın mənə.
Bir eşq duasına dön
Astaca oxun mənə
.
Mən yorardım yolları
Bu dərd məni yormasa…
Arada zəng et barı
Sevinim heç olmasa…
.
həsrətindən tutuşar
Yanar ağzımda dilim…
Yenə küsülü qaldıq
Heyf getdi bir ilim…
.
Məni yuxuda görsən
Balıncını tərs çevir…
Nə olaydı gözlərin
Deyəydi “səni sevir”…
.
Sevin di!
.
Bir yarpaq saraldı, düşdü budaqdan
Bir ümid ağladı, torpaq sevindi…
Fələk seçəmmədi qaranı ağdan,
Dilimdən sürüşdü bir “ah”, sevindi…
.
Yaman səkdim a dost, boranda-qarda
Adicə bir dərd də gəlir div indi
eşqimi itirdim dolayılarda
Qoçaqsan, bir gözəl tap da sev indi!
.
Həyatın sərt üzü , daş-qayadan sərt
Üşüsən, ürəyim isti evindi!
Tanrıdan gəl umma-küsmə Məhəmməd,
Bax sovqat göndərdi, sevin, sevin di!
.
Şeir sevgilim…
.
Məndən şeir istəmə
Ay gülüm, ay çiçəyim…
Min dəstə gülə dəyən
Mənim bircə ləçəyim…
.
Sənə şeir yazmaq ,gülüm,
Şeirə nəzirə yazmaqdı…
Sənə səndən gözəl şeir
Xəyal-xülyada azmaqdı…
.
Sənə şeir yazmaram mən
Günahdı vallah günahdı!
Allahla bəhsəmi girim?
Sən tək şeiri o yaratdı!
Yazıya 677 dəfə baxılıb
