Keçir
Susan məhəbbətin alt yaddaşında
hər an oyanacaq ocaqları var.
Sevincə həsrətli hissin, duyğunun
təzədən qol açan qanadları var.
.
Sən ha gizlətsən də, yavaş desən də
gündüzün səsləri gecədən gəlir.
Evin dərdlərini divar saxlamır,
sədası qonşudan, küçədən gəlir.
.
Dünya fırfıradı bir oxun üstə
gündüzlər gecədən ələnib keçir.
Bu gündən sabaha ümid daşıyan
ömrümüz yuxuya bələnib keçir.
.
Sevincdən gözləri alışıb yanan
yüz eşqin dərdləri bir ah içində,
nə qədər qaçsaq da yaşadıq yenə
gecəli, gündüzlü günah içində.
.
10.06.2015
.
Qəmli baxışlar
.
Necə silim o şəklin mən göz yaşın?
Çarpaz qollar boğur məni şəkildə.
Çıxart məni köynəyinin içindən
enib qalxır ürəyintək şəkil də.
.
Indi hara baş götürüb yol gedir
gəl-gəl deyib, söz söyləyən baxışlar.
Qəm götürüb, dərd yükləyib dağ çəkir
ürəyimə sən çəkdiyin naxışlar.
.
Üz-gözündə son illərin baxışı,
sevincimi qəmlər boğur haçandı,
ha bağrıma basıb, basıb, hey öpdüm,
dərd sönmədi… təzə dərdlər oyandı.
.
… Danış şəkil, danış gözlər, danış, din.
Kim deyir ki illər bizi itirməz?
Baxma mənim sən arxamca beləcə
gözlər məni bir də geri gətirməz.
.
25.06.2015
Yazıya 733 dəfə baxılıb
