Bir gecə bir dəli külək olasan,
Çapıb köhlənini çıxıb gedəsən…
Dan üzü çatasan getdiyin yerə,
Tanrıya min şükür, dua edəsən..
Bağlı qapılara gücün çatmasa,
Pəncərə açasan, evə dolasan…
Görəndə gözündən incilər axa,
Sevdiyin üzlərə durub baxasan…
Yorğun baxışlara tumar çəkəsən,
Külək olduğunu heç kəs bilməyə…
Bağrına basasan darıxdığını,
Sənin göz yaşını heç kəs silməyə…
Bir evdən bir evə rahatca gedib,
Dərdini biləsən sevdiklərinin…
Dərdinə bir həmdəm tapasan bəlkə,
Heç kəs eşitməyə dediklərini…
Acını, ağrını əllərdən alıb,
Aparıb dəryada boğub gələsən…
Bir cənnət gölünün yanından kecib,
Bir ovuc xoşbəxtlik yığıb gələsən…
Sonra…sonra günəş doğa, sabah açıla,
Yer üzü təzədən gələ dünyaya…
Yığasan öz külək qanadlarına,
Əmanət edəsən Yeri Tanrıya…
ÖLDÜRÜB ÖZÜNÜ, DİRİ GƏLƏSƏN…
Bir qapı dalında ruhun ağlaya,
bir qapı dalında ruh həsrət çəkə…
kiminsə qəlbində ovunmaq üçün
titrəyə içində ah həsrət çəkə…
Sevdiyin qapını döyüb durasan..
ürəyin döyünə, gözlərin gülə…
dəstəyə gözünlə sığal çəkəsən,
yandıra içini yaş gilə-gilə…
Gəldiyin yollara dönüb baxasan…
bəlkə addım səsi arxadan baxır…
açılmır qıfılı bağlı qapının…
göydən səda gəlir, bir adam baxır…
Qarşına çıxmaya səni sevənlər,
acını udaraq geri gələsən…
yolboyu özünə məzar qazasan
öldürüb özünü, diri gələsən..
*********
Günahlarım dilimdən
asılıb göyə doğru,
ölən ümid dirilməz,
dirilib deyə… Doğru..
Hər duanın əlləri
gözyaşıyla bağlanır…
hər inamın dilində
ümidsiz dil saxlanır…
Ulduzlara günümdən
danışır gecələrim
bitib tükənmir, Tanrı, -
niyə, kim, necə? – lərim…
Gedir işığa döğru
Yerə işıq adamlar…
Yaşıl yarpaq qırılır..
Olur boşluq adamlar…
Yiyəsizlık it hürür
kimsəsiz yer üzündə…
Qorxu dəyir gözümə
qırılan hər dizimdə…
Sabahlarım açılır
şeytana daş atmaqla…
Başımı SƏNdən uzaq
dualara qatmaqla…
Mən qopmaq istəyirəm
bütün günahlarımdan…
Torpaq dördəlli tutub
mənim ayaqlarımdan….
********
Küsmüşəm səndən, Tanrı…
barışığa adam göndər.
əlimi əlinə versin,
nə Həvva, nə Adəm göndər..
aç xurcunun ciyəsini,
qur baxtımın dəyəsini,
yiyəsizin yiyəsini
qaytar öz evinə göndər.
yaxşı kişi yaxşı atın
belində getdi gəlmədi.
zamanımız kor saatın
milində bitdi, gəlmədi.
Ilanlar eynək gəzdirir
zəhərini hədəf üçün.
incilər dərya dibində
qiymətlidi sədəf üçün..
Bir kimsəsiz ev içində
hörümçəyə kirə qaldım…
belinə kəndir bağladım
tor taxtından yerə saldım.
Səndən sənə olan sözüm
barmağımın ucu boyda…
günahımsa cəhənnəmin
yer üstündə sacı boyda…
Papağını qarşına qoy.
başını al ələ Tanrım!
bəndələrin yola gəlmir,
başıma kül ələ, Tanrım…
Yazıya 563 dəfə baxılıb
