YAP İdarə Heyətinin üzvü, Veteranlar Şurasının sədri Arif Rəhimzadə, Veteranlar Şurasının üzvü tarix elmləri doktoru Dilarə Seyidzadə, YAP Mərkəzi Aparatının şöbə müdiri Rufiz Qonaqov, şöbə müdiri əvəzi Zəkiyyə Musayeva və YAP Gəncə şəhər təşkilatının sədri Ramil Orucov Gəncə Dövlət Dram Teatrının yeni binasına baxış keçiriblər.

Teatrın direktoru Aqil Bəhramlı qonaqları salamlayaraq yeni binada yaradılan şərait haqqında məlumat verib. O bildirib ki, teatrın yeni binasında 478 yerlik böyük tamaşaçı zalı, 22 tamaşaçı yerlik lojalar və 120 yerlik kiçik tamaşaçı zalı var. Yeddimərtəbəli binada, həmçinin iki zaldan, 135 eksponat və rəsm əsərlərindən ibarət Gəncə Teatr Muzeyi, zəngin kitabxana, xoreoqrafiya zalı, qrim otaqları, mehmanxana, kafe və digər zəruri infrastruktur yaradılıb. Bir sözlə teatrın yeni binasında tamaşaların nümayişi üçün müasir texniki şərait təmin edilib, yaradıcı heyətin məşqləri ilə bağlı bütün məqamlar nəzərə alınıb.

Görüşdə həmçinin, teatrşünas-tənqidçi Anar Bürcəliyevin qələmə aldığı “44 günlük Zəfər tarixinin Gəncə şəhidləri” adlı kitabı qonaqlara hədiyyə edilib.