(Şəhid Gizir Nəciməddin Quliyevin son sözlərinin təsiri ilə)

.

Qalmır düşmən izi bərədə, bənddə,

O əsgər bərəyə, bəndə yol çəkir,

Bir ana gözləri yol çəkir kənddə

Bir şəhid arzusu kəndə yol çəkir.

.

Özü gedən yollar daşlı-kəsəkli,

Qan seli üstündən körpü də yoxdu.

Qalxdığı zirvələr çənli-çisəkli,

Axı hamar yollar hərbidə yoxdu.

.

Onun baxışıyla çəkilir duman,

Onun atəşiylə gecə nurlanır.

Onun addımıyla dəyişir zaman,

Çəkməsi altında yol hamarlanır.

.

Özü əzəl gündən haq yolçusudu,

Ucalır yolları Tanrıya doğru.

Onun son diləyi yol arzusudu,

Üzündə təbəssüm oynadır ağrı.

.

Şirin gülüşləri, nurlu bənizi,

Silir dərd yolunu, aman yolunu.

Axırda göylərdə görünür izi,

Tapır süd yolunu, Saman yolunu.

.

Qalmır yağı ləpri bərədə, bənddə,

O Gizir bərəyə, bəndə yol çəkir.

Bir ana gözləri yol çəkir kənddə,

Bir şəhid arzusu kəndə yol çəkir

..

22 sentyabr 2023-cü il