Gecəni gündüzə qatıb işlədin,
Kiminsə dadına çatıb işlədin,
Bir quş çimiriylə yatıb işlədin,
Yetdin arzuların hansına, Ramiz?!
.
Sənə üz tutana sən inanırdın,
Bilən yoxdu hansı dərdə yanırdın,
Özünü hamıdan güclü sanırdın,
Dostlar yığışanda başına, Ramiz!
.
Dostlarla doğmaydın həddən ziyadə,
Həmişə mehriban, qayğıkeş sadə,
Bəs niyə əlindən tez düşdü badə,
Kim soyuq su qatdı aşına, Ramiz?!
.
Qoruyub o uca insani hissi,
Heç zaman seçmədin yaxşını-pisi,
Ən böyük sınaqdır indi məclsin,
Oyan, dostlarını gəl sına, Ramiz!
.
Sən idin ağrını, acını yenən,
Qoşmayla dillənən, cinasla dinən,
Bizim toyumuza gəlmişdin dünən,
Bu gün necə gedim yasına, Ramiz!
Yazıya 63 dəfə baxılıb
