Yoxsa ey içimi yandıran adam,
Ömrünü qiymətli bəxşiş bilirsən?
Pul qoyub özünü donduran adam,
Canının qədrini yaxşı bilirsən!

Qorxdun tükənəsən,ömrü-gün gedə,
Vaxtın acığına bəlkə yatırsan?
Yüz oyundan çıxıb demək indi də
Allahın işinə əl uzadırsan??

Mənəmlik dərsini yaxşı keçmisən,
Bu sevda ha yandan başına gəlib?
Ömür nəşəli mey,bir yel içmisən
Deyəsən yamanca xoşuna gəlib!….

Ayrıdı hər kəsin dünyada malı,
Pay düşüb hərəyə ilk bölgü günü.
Sən şüşə altında rahat yatmalı,
Mənmi çəkməliyəm sənin yükünü?

O yüz il sonranın başqadı rəngi,
Əməlli fikirləş,nə qədər sağsan.
Qanında yaşayan qara xərçəngi
Yüz il sonrayamı aparacaqsan?

Kimin gərəyidir nursuz bəbəklər,
Saçında namərdlik dəni.
Dəqiqmi bilirsən xoflu ürəklə
Bağrında basacaq gələcək səni?

Gələcək,təzədən qalxmaq anında
Sənə bağışlamaz bu nankorluğu
Hara aparırsan soyuq anında
Kini,ədavəti,rüşvətxorluğu?

Sular,bilirsənmi nə gözəl axır,
Qəşəngdi bu günün günəşi,ayı.
Yüz il sonraların dəcəl uşağı,
Səni fışdırığa basmamış ayıl!

Görünür alladıb nağıllar səni,
Gün gələr zəhmətin görərsən gidi.
Şüşədə yaşayan div canı kimi
Ruhunu daşlara çalar bir igid!

Ən ağır yuxud qəflət yuxusu,
Ondansa yaxşıdı rahat öləsən.
İndi yatırsan ki,atom qorxusun
Kitabdan oxuyub sonra biləsən?