Məmməd Hacızadə
Yaş üstünə,yaş gəlir,
Üzünə qırış düşür,
Səni belə görəndə
Ürəyimə qış düşür.
Göz yumub məhəbbətə,
Varmadım səadətə,
İnan,bu cinayətə
Bir ömürlük iş düşür.
Hey özümü unutdum,
Hirsimi bir-bir uddun..
Göz yaşını qurutdum,
Sevginə alqış düşür.
Olsan
Olub şeh damlası dan ağarınca,
Gələrəm yanına sən yarpaq olsan.
Dünyaya əbədi yumub gözümü,
Yataram qoynunda sən torpaq olsan.
Kiçildim,kiçildim öz gözümdə mən,
Yenə mərd dayandım öz sözümdə mən,
Özümü kəşf etdim öz-özümdə mən,
Azmaram yolumdan sən dayaq olsan.
Dərd nədir bilmərəm gülərəm sənlə,
Dünyanı bir cənnət bilərəm sənlə,
Yarıb ürəyimi bölərəm sənlə,
Mənim bu sevgimə sən ortaq olsan.
Girsən gül bağıma çiçək dərərsən,
Saçına çiçəkdən çələng hörərsən,
Mənə bir ömürlük şərəf verərsən,
Mənim həyatıma sən qonaq olsan.
***
Saxla gəlin maşının
Orda mənim canım gedir.
Yer ayağımaltdan qaçır
Göyüm asimanım gedir.
Saxla, gəlin maşının
Alım bütün vücudumu
Qoy götürüm kül olmadan
O ürəkdən eşq odumu.
Saxla, gəlin maşının
Orda iki gözüm gedir
Sınar belim, qol, qanadım
Dilim ağzım sözüm gedir.
***
Qoy,ölüm səndən öncə,
Günahımı yuyum,gəl.
Həsrətindən odlanım,
Sənsizliyi duyum,gəl.
Gül üstə,yarpaq altda
Sinəmiz var dağ altda.
Gəl yataq torpaq altda,
Yanında uyuyum,gəl.
Mən başqa arzu bilməm,
Bu ruhda yuxu bilməm,
Hava bilməm,su bilməm,
Gəl,havam gəl,suyum,gəl.
Yazıya 734 dəfə baxılıb
