QARABAĞIM QAN AĞLAYIR
Şəhidlərin qanı üstə,
Qarabağım yas saxlayır.
Deyən yoxdur doğru sözün,
Qarabağım qan ağlayır.
Nə çox oldu sahib çıxan?!
Tamah saldı yerdən qalxan.
Uzaqlardan qərib baxan,
Qarabağım qan ağlayır.
Soldu gül-çiçəkli bağı,
Yerlə yeksan etdi yağı.
Xarı bülbül deyir ağı,
Qarabağı qan ağlayır.
Dünən səbr,bu gün səbr,
Səbr eləmək bəs eləmir.
Xocalım imdad diləyir,
Qarabağım qan ağlayır.
Nəfsi acların badına,
Getdi vətənim satına.
Ya Rəbb,özün yet dadına,
Qarabağım qan ağlayır.
VƏTƏNİN ANASI ÖLÜB
Başı üstə bulud qara,
Ocağının odu sönüb.
Neçə vaxtı düşüb dara,
Vətənin anası ölüb.
Yox sirrini saxlayanı,
Yox yarasın bağlayanı,
Yox dərdinə ağlayanı,
Vətənin anası ölüb.
Köksündə düşmənin oxu,
Biganədir ona çoxu,
Kim qeydinə qalsın axı,
Vətənin anası ölüb.
Yoxa çıxıb igidləri,
Dünyaya sığmaz kədəri.
Özünü boğur qəhəri,
Vətənin anası ölüb.
Yazıya 1114 dəfə baxılıb
