Elə hey yuxumdasan
Gözüm yumulan kimi.
Ucsuz-bucaqsız dəniz,
Bir sən,
Bir mən,
Bir gəmi.
Qorxuram bu şirinlik
Oğurlasın qəlbimi.
Yuxuma gəlmə bir də.
Sənin bu qərib sevgin,
Ehtiras doğurursa.
El-aləmə car çəkib
Sirrini bağırırsa,
Məni də yuxularda
Öpüşə çağırırsa,
Yuxuma gəlmə bir də.
Məni əbədi sevgin,
Ömür dostun bilməsən.
Yolumda qurban gedib
Ağuşumda ölməsən,
Yuxu nağıl kimidi
Həyatıma gəlməsən
Yuxuma gəlmə bir də.
***
DODAQLARIN
Ağ gilasdı, şəftəlidi,
Çiyələkdi dodaqların.
Sehirləyib yıxır məni,
Nə kələkdi dodaqların.
Nə çəkmisən, nə qatmısan,
Şandı, baldı dodaqların.
Elçi düşüb bir gün məni-
Məndən aldı dodaqların.
əsrarına, sehrinə bax,
cana təpər dodaqların.
Dodağımda möhrünə bax,
Məni öpən dodaqların.
***
AXTARIRAM DURNALARI
Xəyallarım yorğun-yorğun,
Haraylayır dağlı bağrım,
Bizim göldə oğrun- oğrin,
Hərdən üzən durnaları.
Ay qız, dərdi boşa görüm,
Sər dəyməsin yaşa görüm.
Kaş yenidən qoşa görüm,
Bir vaxt süzən durnaları.
Aman vermir sıx dumanlar,
Xəyaldırmı bu gümanlar.
Axtarıram bir zamanlar,
Məni gəzən durnaları.
Göynəyirəm söz əlindən,
Alın, verin buz əlindən.
Bapbalaca qız əlindən,
Uçub bezən durnaları.
***
BAXIŞLAR
Bir gün qara telimi
köklədim sinəm üstə.
Cərgələndi ağılar,
Göynəyən sitəm üstə.
Döyükdü ürkək-ürkək,
Sağa-sola baxışlar.
Bəhanə nəyə gərək
Baxıb dola baxışlar.
Bir qızın şirinliyi,
Körpəlikdən yanadı.
Ata-ana əzabı,
Göz önündə qanadı.
Dikildi kövrələrək
uzaq yola baxışlar.
Büküldü kövrələrək,
Döndü qula baxışlar.
Başı lentli arzuma,
Baltasız cəllad oldum.
Ötüb keçən illərin,
Başdaşına ad oldum.
Yetim-yetim qısılıb
Cana bala baxışlar.
O can ipdən asılıb,
Dönər dula baxışlar.
***
ANAM LAY-LAY
Dumanlı körpəliyim, taxta beşiyim dindi,
Bala öz anasına layla deyəcək indi:
Kipriyində dən gilə,
Sil onu gülə-gülə.
Ömrün gümüş payında
Şirin-şirin mürgülə.
Həsrət qaldın yuxuya necə qəmlər əlindən,
Sənin cənnət qoxuyan bağrına həsrətəm mən.
Ay canım, gözüm ana,
Nə çoxdur sözüm ana.
əl boyda ürəyinə
qurbanam özüm, ana.
Qabar olmuş əlinlə ili illərə tikdin,
Üç övladın yolunda, ay ana, nələr çəkdin?
Şiprin layla dedi,
əziyyətinin barı.
əlinin üstündədi
qəlbimin şah damarı.
Yazıya 762 dəfə baxılıb
